HomeԱՌԱՋԻՆ ԷՋ HomeԿԱՊ
 
ՎՊ ԱՇԽԱՏԱԿԱԶՄ `
ՆՈՐՈՒԹՅՈՒՆՆԵՐ
07.07.2017
Վերահսկիչ պալատի նախագահ Լևոն Յոլյանը ներկայացրեց ՀՀ պետական բյուջեի կատարման մասին տարեկան հաշվետվության վերաբերյալ Վերահսկիչ պալատի եզրակացությունը
ՀՀ վերահսկիչ պալատի նախագահ Լևոն Յոլյանը ՀՀ Ազգային ժողովի 2017 թվականի հուլիսի 6-ի արտահերթի նիստում ներկայացրեց <<ՀՀ 2016 թվականի պետական բյուջեի կատարման մասին>> տարեկան հաշվետվության վերաբերյալ Վերահսկիչ պալատի եզրակացությունը:
Իր զեկույցում ՎՊ նախագահ Լեւոն Յոլյանն անդրադարձել է պետական բյուջեի կատարման տարեկան հաշվետվությանն առնչվող որոշ սկզբունքային խնդիրների՝ խոսելով բյուջետային գործընթացում վերջին տարիներին որոշակի առաջընթացի մասին, որում կա նաև Վերահսկիչ պալատի դերակատարումը:
ՎՊ նախագահը կարեւորել է վարկային եւ դրամաշնորհային միջոցների, ինչպես նաեւ պետության կամ համայնքների կողմից հիմնադրված կազմակերպությունների ֆինանսական հոսքերն ամբողջությամբ գանձապետական համակարգի միջոցով շրջանառելու հարցը:
Վերահսկիչ պալատն անընդունելի է համարում այն մոտեցումը, որ հանրային հատվածում գործող նման կազմակերպություններն, անկախ իրենց կազմակերպաիրավական տեսակից, օգտագործելով պետական նշանակության ֆինանսական ռեսուրսներ, իրենց ֆինանսական շարժը կազմակերպում են առևտրային բանկերով:
Պարոն Յոլյանի խոսքով՝ որքան շատ բյուջետային միջոցներ շրջանառվեն գանձապետական համակարգի միջոցով, այնքան վերահսկելի եւ թափանցելի կլինի այդ միջոցների օգտագործումը:
ՎՊ նախագահն անհրաժեշտ է համարել գանձապետարանին այդ ծրագրերի մասով նախնական հսկողություն իրականացնելու հնարավորության տրամադրումը:
Նա անդրադարձել է նաեւ պալատի կարողությունների զարգացման խնդիրներին՝ նշելով որ պալատը բյուջեի կատարման տարեկան հաշվետվությունը ստանում է մայիսին և դրանից հետո մեկ ամիս ժամանակ է պահանջվում, որպեսզի Պալատը պատրաստի իր եզրակացությունը: Այսինքն՝ ուսումնասիրությունները կրում են վիճակագրական և կամերալ բնույթ:
Ըստ պարոն Յոլյանի՝ նոր Սահմանադրությունը Պալատի առջև դնում է որակապես այլ խնդիր: Այլևս, պետական բյուջեի կատարման վերաբերյալ Պալատը տալու է եզրակացություն՝ բացառապես հաշվեքննության արդյունքների հիման վրա:
Վերջում ՎՊ նախագահը ներկայացրել է բյուջեի գործառնական դասակարգման ծախսերի ուսումնասիրության հիմնական ցուցանիշները և դրանց շեղումները:
Ըստ ՎՊ եզրակացության՝ պետական բյուջեի կատարման հաշվետվության ցուցանիշներն արժանահավատ են, սահմանված պահանջները՝ կատարված:
Copyright by Control Chamber of The Republic of Armenia © 2017